شكد مؤسف من تشوف نفسك مضطر للتحدث بالعامية في وقت تريد تخاطب جمهور نخبوي واعي ويفترض ان تتحدث وياه بأسلوب شوي متعوب عليه حتى تخلي النقاط على حروفها.
لكن المتلقي تلكاه لو صام آذانه عن سماع الحقيقة لو أحول وميشوف بس الي تتماشى وي هواه وتعزز رصيده الجدلي الي من الممكن أن يكون من عوامل نصر الصنمية الي هو يؤمن بيها.
ماعلينا نرجع لعنوان سالوفتنا هاي ولو أطول عليكم ولا عبالهم جماعة الثلث الضامن نريد هنا نكلهم عفية على ما انجزوه نوابهم اليوم تحت قبة بيت الحاج عنكوش وليس تحت قبة البرلمان.
طبعا هنا حديثي كمواطن مكرود أومن بضرورة قيادة المرجعية وتوجيهها لهاي الأمة وأناضل( ولو هاي تذكرني بنضال عزة الدوري )_ اناضل من أجل ان تكون للمكون الأكبر كلمته في المعادلة السياسية الي شوهتها عنتريات بعض قادة الثلث الضامن ولكن احس نفسي مجبر على التعامل معهم كواقع يمثل الأغلبية وهذا ليس لعظيم خطرهم لكن ياجماعة من جلة الخيل.
هس واحد من المصابين بداء (الزملو_قفلية) يكلي شدعوه هيج تخاطب قادة مكنتهم اصوات ناخبيهم من تسيد المشهد وهاي هي أعراف الديمقراطية واصولها.
احب اكلك يخوي الله يشافيك انت سامع بهذا الي تكول عنه بنته بعد ان سألوها عنه كالت(ذهب أبي ليشق النفس نفسان ) اي عمي هو من غير سماحة مدري معالي الحجي نوري أول من بدأ بشق الصف الشيعي وحوله من نفس وحدة لنفسان بعد أن غرته اصوات الناخبين إلى ما كانت مبنية على حظ وبخت وراح أسس لكيان سياسي سماه دولة القانون وطشر لمتنه وخلانه طرائق قددا معرضين للابتزاز ومضطرين للتوقيع على اي شرط حتى لو كان مخالف للعرف والقانون والدستور، هذا كله بعد ان بذلت المرجعية ورجالاتها جهودا جبارة هي ومن يؤمن بقيادتها طبعا واني منهم لغرض توحيد كلمة الشيعة واغتنام الفرصة إلى ماكان يحلم بيها جدجده.
ومو بس هاي شلون واحد يحترم عقله وينسى تفاهماته مع مسعود الي يعتبرونه اليوم رمز الخيانة وبعض رموز الإرهاب من الغربية من اجل الكرسي حتى يقصي بعض القوى الوطنية الشيعية صاحبة التأريخ والدماء.
انه عجبي وعتبي على النخب الي تصفق وماتحاسب ولا تراجع ذاكرتها وهي تحمل القاب نخبوية(أيباه يفتحة الصدر) على كولة صدام حسين على هيج مثقفين لأن مجاي استوعب جهلهم لو ضمائرهم الي باعوها بثمن رخيص شلون فاتهم يشوفون خميس الخنجر رمز الإرهاب والداعم له شلون جابوه حتى تصير لهم الغلبة وتكثر مقاعد ما يسمى بتحالف البناء حتى يهمشون اخوتهم الشيعة الي كانوا بتحالف الإصلاح، لا والي تضحك الفاكدة ولد شكد قاتلوا من اجل فوز الحلبوسي لرئاسة البرلمان صار الحلبوسي اليوم بنظرهم احد أركان التآمر على المذهب بعد مقتدى والبارزاني وصارو يدعمون برهم صالح حتى يصير ريس للجمهورية الكشرة ونسو تصويتهم لفؤاد حسين عدما كان مرشح مسعود للرياسة بذاك الوكت ونسو انه صالح وحمايته متهمين بقنص المتظاهرين ونسو اعلامهم إلي يسمي صالح بالرئيس الانفصالي.
حملتهم على مقتدى (ولو هو يشبه ذاك الي ذهب ليدني الغريب ويبعد القريب) ماعلينا وصلت الفكرة ان شاءالله…وعبالك ميعرفون مزاجه ويتصورون ان الشعب ميعرف انه هم وياه دافنيه سوى وهو ميقل عنهم بالكل شي والكلاشي بس اذا هو هيج متمرد على الإجماع الشيعي الي تبجون دم عليه ليش تحالفتو وياه ضد ترشيح المرحوم الجلبي وليش قنعتوه ان يصوت لكم ضد عبد المهدي من كان الجعفري منافس وليش بحكومة المالكي الثانية رفعتو رصيده من ثلاث وزارات الى سته وليش هس تعيبون عليه تحالف مع حلفاءكم العتك مثل خميس ومسعود وليش الحلال عليكم حرام عليه.
هذا مو معناه ان الصدر خطواته موفقه وإلا لو جانت لوجه الله لكان الله تتم له على خير ومشت الجلسة بنصاب كامل بس هم انتو وهو عصفور كفل زرزور وثنينكم طيارة بدليل هو يفتخر أمام الوادم بعدم رضوخه للمراجع ونسى ان ذولي الشياب اقصد المراجع هم وصية الحجة بن الحسن الي كال عنهم حجتي عليكم والراد عليهم كالراد علي، وانتم ناس تدعون بتقليدكم للصدر الأول الي مر عل استشهاده اكثر من أربعين سنة يعني ماعرف خلال هاي المدة منين تاخذون مستحدثاتكم إلا اللهم انتم ناس بلا دين وعدكم مشكلة مع مرجعية السيد السيستاني الي يفتخر بيها كل موالي لعلي بن ابي طالب ومو بس هاي مشكلتكم وي كل ما يمت لهذا السيد الجليل بصلة من وكلاء او مؤسسات او عتبات او حتى المسميات السياسية الي ترجع اله في كل صغيرة وكبيرة هم شنيتوا حربكم عليها وللامانه هذا الدور تقاسمتوه وي اتباع الخط الصدري الي يشوفون شكو مخالف لهم خارج عن الملة والشريعة وكأن دين الله والوطنية والإخلاص منهم وتبطل.
لاياعمي الحجي مو هيج والي يخالف رأي الناصح الأمين يتعب تر ولكم في الموقف الذي وضعكم به الصدر خير عبرة كون تراجعون سياستكم واعلموا انه يقال أن الله خلق الذباب ليرغم به انوف المستكبرين أمثالكم فكونو على حذر وتحلو بمزيد من الوعي فلبربما هنالك صولة أخرى لأبو هاشم وخاف احنه المكاريد نروح بالرجلين.
