يگول (وحيوح):
اني واگف بطريق العمارة بمفرگ شيخ سعد ،واچت سيارة من العمارة ،انگلبت يم المفرگ. يگول : احنه الواگفين اخذتنه الغيرة وركضنه نريد نطلع العبرية، خاف حالتهم خطرة ،ميتين عدلين ؟؟؟؟!!!..
يگول وحيوح:وصلنه للسيارة باوعنه ، لگينه العبرية ما بيهم شي، كلهم واعين بس مضمدين ،الشاد ايده والشاد رجله والشاد راسه .
يگول وحيوح: صلينه على محمد وآل محمد، وصحنه سبحانك ربي يمكن الملائكة مضمدتهم..
طفر علينه شايب من العبرية ، گال :عمي يا ملائكة، هذا سايقنه المسودن من العمارة ليجاي هاي ثالث مرة يگلبنه..

شاهد سالفتنه :
شعبنا شبع گلبات ،و هم يرجع ويصعد بنفس السيارة، ونفس السايق..
من اچت الشرطة ، گلنالهم :عمي غيروهم ،كافي بدلوا السايق!!!، بدلوا السيارة!!! ،غيروا طريقكم إذا بقينا هيج كلنا انموت والسايق يبقه مجلب بالستيرين .. إلى متى؟
الشرطي گال : الاسهل انغير العبرية ..

البروفسور د.ضياء واجد المهندس
مجلس الخبراء العراقي