٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رسالة الى اهلنا عموما بالشطرة والغراف والرفاعي والنصر، وقلعة سكر، انا ما الي شغل وما يعنيني امر الناصرية وسوق الشيوخ والچبايش وكرمة بني سعيد والفهود لان ما اعرف اي معلومات عن هذه الاقضية والنواحي سابقا وحاليا .
******************
يا اهلنا بالشطرة وفي شمال الشطرة
((كفى لعب دور الشحاتين يا اهل الشطرة))
عشرون عاما على رحيل حقبة حكم التكارتة والدوريين السوداء ..
وعندما عدت الى العراق وجدت جميع المحلات في الجنوب تحمل عبارة محل بركات ..
گبوركم بضخامة قصوركم
بس تشكون وتبچون مثل …
اكو واحد بيكم ما بنى قصر، والقصر تسمونه دبل فاليوم ؟
بالشطرة حي اسمه حي التجار وشارع اسمه شارع دبي
اكو واحد بيكم ما عنده سيارة لو ستوتة لو تكتك لو ماطورسكل؟
اكو واحد بيكم ما عنده ٣ كيلوات ذهب جوة الجرباية وعشر ملايين بنضدة الدواشك؟
اكو واحد بيكم مو موظف لو ابنه وبنته ومرته موظفين؟
اكو واحد بيكم ماعنده ولد شرطي جندي لو ضابط بالجيش او الشرطة لو منتسب بالامن الوطني؟ اعداد كثيرة من اولادكم يعمل بعقد ويستلم راتب بدون ان يبذل جهد او عمل (إمسختچي ١٠٠٪ كاضيها لو نوم بالدائرة لو يثرم بصل) ؟
اكو واحد بيكم ما عنده راتب جهادي نضالي؟
طلعتوا كلكم رامين الريس مرتين وخاطينه!!
اكو واحد بيكم ما عنده جواز سفر؟
اكو واحد منكم اخذوه مكلفية لو احتياط؟
اكو واحد بيكم مثل گبل صار هارب ويخاف يركضون وراه الجيش الشعبي ويطفر من سطح لسطح؟
اكو واحد بيكم فد يوم اخذوه هو وسيارته البيكب يشتغل من الصبح الى العصر لمدة شهرين (صخرة).
اكو واحد بيكم ما عنده راتب رعاية؟
اكو واحد بيكم ما عنده تفكه؟
كلما تصير لعبة كرة قدم لو ميت واحد يرمي عشوائي بها اكداس عتاد تكلف ملايين الدنانير ومصوب لو كاتل طفل لو ثلث اطفال … وبعدين ينسى اللي سواه امس ويكعد الصبح بالگهوة ينعى ويبچي ويتشكى منينلي ما عندي!!.
اكو واحد منكم اولاده مو بمدارس مجانية؟
اكو واحد بيكم دفع ضريبة تبليط الشارع لو ضريبة قناة تلفزيون؟
اكو واحد بيكم ما شبع خبز ابيض ورز بسمتي وعنبر ولحم ودجاج وموز وتفاح؟
بالشطرة شارع اسمه شارع الدجاج تذبح وتهلس وكبل للجدر بعد ان كانت الدجاجة مكرمة من الريس !!!
حتى السبالت فوك رووسكم!
غرف استقبال مرمر إيطالي!
مخلصينها برشلونة وريال مدريد وفيس بوك!
انتم شتردون؟ شبيكم يقشمر بيكم ابو قناة الشرقية سعد البزاز (گواد عدي) .
شبيكم يقشمر عليكم ابو قناة دجله.
شبيكم؟ شوية فكروا بعقل، هاي القنوات تضحك عليكم يردون يرجعونكم على ايام (المزبن) قبل ايام (اللف) .
فلوس ماكو؟ مثلا نسوان مو جاي تتزوجون بنات ٩ و١٢ و١٤؟
قنوات تلفزيونية بالعشرات غير الشرقية ودجلةً!!
شبيكم مثل الچلب ما يحب الا خناگةً!!
شبيكم عمي شو ما شاء الله السفر مفتوح؛ يوم باذربيجان ويوم بجورجيا حتى اوكرانيا حسدتوها، لان سويتوها علاوي الحلة بعد ما مليتو من ايران واذربيجان!
شبيكم عمي عايشين حياتكم احرار!
بكل دول العالم المواطن يخاف من الشرطي بس انتم الشرطي يخاف منكم….. !!!!
قررت ان اكون كاتب ضد الشعب لتأديبه فان الدلال قد افسدكم ولا بد من تأديبكم..
فما ادبتكم سيوف الحكام ولا سياطها لكن قلمي سيؤدبكم..
لا تنسون ايام الباذنجان (وحش الطاوة)، والطحين المتروس عضام الحمام الميت بالسايلو ونصه السحالة!!
كافي لعب دور الشحاذين!