…………….     أونْ وحدي
الشمس من تشتعل تبرد
الكمر من يختفي يسْوَد
اون وحدي
الظفيره  المايحلها الليل تتفرهد
اسكت والجرح ماطاب
طفل من غير حضن امه تايه وين يتوسّد
لا تحسب انجوم الليل..جثير النجم ماينعد
الدمعه التحترك بالعين  تجوي من تبوس الخد
الماي الماتجيسه النار يرجف بالشته ويجمد
أون وحدي
وصلاة الخوف من باجر
ترهب من يجدْ الجَد
السمه ماتنزل اعله الكاع
بس باب السمه يوجع اذا ينسد
عراضه ولوحة التابوت بزنود الزلم معضد
اوكف يازمن رد بينه للطوفان ..على ظهر السفينه النذل مايصعد
أون وحدي
العين ابلا كحل شتسوّي بالمرْوَد
مشيت ولسه دربي ابعيد . ماطول الخناجر بالجرح تنحد
ومادام الضماير مايمرها الخوف وثوب المستحه امسرّد
اوكف واليصير يصير
بسك يابحر مو كافي جزرك   هيج
خلّصنه عمرنه وماوصلنه المد
جرحنه بطولنه يوجعنه ما هوّد
علكنا اشموع يابو اشموع بس الليل بعده اسود
باجر تنطفي الظلمه
وامي تفك حزنها وتنزع الجرغد