من كنت زغير بالثمانينيات كنت اسمع اذاعة للمعارضة العراقية تتوعد صدام بالسقوط وتكله راح تلحك ربعك ام كلثوم وفريد الاطرش ولحد هسه مااعرف ليش المذيع جان يلح على فكرة ان صدام راح يحشر يوم القيامة مع ام كلثوم مع ان ثومة محبوبة جدا وكانت تقوم باعمال خيرية وكانت ترعى الفقراء وعوضت خزينة مصر بعد نكسة حزيران ومن ماتت ماظل أمير ولاغفير إلا وطلع بجنازتها والعالم العربي كله حافظ أغانيها.
المهم المعارضة العراقية مكدرت تسقط صدام ولاكدرت تحشره بخانة المسكينة ام كلثوم ولافريد الاطرش المهاجر السوري الي طفش من السويداء للقاهرة وظلت تغني وتهوس وكلشي ماكو وصدام حواجبه شيبن وهو يدخن جروت ويحتفل بعيد ميلاده.لحد ماقرر النظام الدولي ازاحته من الحكم وقرر ان يجيب اغرب نظام سياسي على وجه الارض، ناس صعدت وناس كعدت وناس تقاوم الاحتلال بعناوين الشيعة والسنة وصار العراق خان جغان وكل دول الجوار جابت كوانيها وكامت تعبي وكل دولة وظفت مجموعة تمجد وتقدس لها وضاع الحرامي والقاتل وتاهت الامور وماصرنا نعرف مشعل من فانوس وطائفية ونهب وسرقات ونظام سياسي مرعبل واليفتهم والمايفتهم يقرر ويحكم، وصار عدنا مية نظام سياسي. عدنا جيش وعدنا شرطة وعدنا مخابرات وعدنا امن وطني وعدنا اجهزة كثيرة تعمل ليل نهار. وعدنا زعامات وعدنا جيوش متعددة ومراكز قرار متعددة وشي بصف شي وواحد ميرتاح للثاني وصار عدنا صراع الطوائف والقوميات وظهرت العديد من الزعامات وكلها تفتهم بالسياسة واحد يشبهوه ببريجنسكي والثاني بزيلنسكي والثالث بجيفارا والرابع بهيجل والخامس بفوكوياما وكل واحد وريث فيلسوف وسياسي عبقري وزعيم بينما البلد خربان وتعبان وقرفان.
يعني البلد صاير مية وصلة وزوج الي يدخل روحه بالمعمعة ويحاول يسوي شي، بس المنظرين الطافرين بره يتوعدون باسقاط النظام ونسفه وهم طبعا بحكم معرفتنا بيهم جذابين لان من اجوي من الخارج وية المعارضة كانوا رايدين مناصب ولان مانطوهم الربع وعلسوهم راحوا يشتمون ويكتبون وينطلقون بعبارات خريط ويتجاهلون طبيعة هذا النظام الي هو مو نظام.
هذا الي هو مو نظام لانه متعدد الاوصال ممزق موزعة ولاءاته على دول عدة وكل طرف يمثل منظومة… نظام يشبه كويكب تايه بالفضاء وينطلق بسرعة مية الف كيلو متر بالثانية وساعة يكلون راح يرتطم بالارض وراح يعادل انفجاره عدة قنابل نووية يعني منحتاج روسيا تهدد العالم الحر.وناس تكول راح يضرب الكمر ويفلشه. وناس تكول لا راح يمر قرب الارض بإثنعش مليون كيلو متر.وناس تكول راح يبقى يفتر بالسماء مثل الاثول وميعرف وين يروح ويجوز بعد كم سنة يهدد كوكبنا.
يعني النظام العراقي هذا مو نظام معروف حتى يجي واحد يسقطه وإذا هو موزين فإلي يجي انكس منه ليش؟ لان الموجودين بالعراق ويتصارعون مو ملائكة وشياطين الكل فاكه عيونها عالمناصب والمكاسب وتريد فلوس وهروس والناس نفس الناس يحجون شكل ويسوون شكل ثاني نفاق بنفاق وماكو نتيجة حقيقية يعني ماعندك واحد تثق بيه ولاعندك واحد تحاكمه لان لازم تحاكم الكل زين شلون وانت تعرف وتشوف بعيونك الي يحجي عالفساد فاسد واليطالب بمحاكمة الحرامية حرامي والي يريد القانون يسود هو اول واحد ضاربه بجلاق.
